കളമെഴുത്തും പാട്ട്

ഭദ്രകാളിയുടെ രൂപം അഞ്ചു നിറത്തിലുള്ള പൊടികളാൽ (അരിപ്പൊടി, കരിപ്പൊടി,മഞ്ഞൾപ്പൊടി, പച്ചപ്പൊടി,ചുവന്ന പൊടി) കളം എഴുതി , ആ കളത്തിനു മേൽശാന്തി ക്രീയകളാൽ ജീവൻ നൽകി ഭഗവതിയെ സ്വീകരിച്ചു ഇരുത്തി നിവേദ്യം നൽകി പ്രസന്നയാക്കി ശേഷം കുറുപ്പ് സർവൈശ്വര്യ അഗ്നി നാളത്താൽ കളത്തിനു ചുറ്റും ഉഴിഞ്ഞു സ്തുതിച്ചു പാടി ഭഗവതിയെ സന്തോഷിപ്പിച്ചു തിരികെ അയച്ചു കളം മായ്ക്കുന്നതോടെ കളമെഴുത്തും പാട്ട് എന്ന വഴിപാട് പൂർണ്ണമാകുന്നു. ദാരികവധം കഴിഞ്ഞതിനു ശേഷമാണ് ഭദ്രകാളിയുടെ കളമെഴുത്തുപാട്ടിന്‌ ജന്മം എടുത്തത്. പാണ്ഡ്യരാജവംശത്തിൻ്റെ പടിഞ്ഞാറുള്ള മലനാട് വസിക്കുന്നവരുടെ പരദേവതയായി വാണരുളുന്നതിന് ഭദ്രകാളിയെ ഇവിടെ കുടിയിരുത്തുകയും, പരശുരാമനാൽ നിർമ്മിതമായ ഭഗവതി ക്ഷേത്രങ്ങളിൽ ഭഗവതിയെ ആരാധിക്കുന്നതിനുള്ള ഭദ്രകാളി പാട്ട് എന്ന കളംപാട്ട് നടത്തുവാനായി അവകാശമുള്ള കുറുപ്പ് മുഖേന ആരംഭിക്കുകയും ചെയ്തു. ക്ഷേത്രരൂപ സങ്കല്പം ഉടലെടുക്കുകയും പൂജാവിധി ആരാധനാ സമ്പ്രദായങ്ങൾ എന്നിവയോടൊപ്പം ധൂളിചിത്ര ആരാധനാ രീതിയായി കളം പാട്ടിനെ കളമെഴുത്തു പൂജ തിരിയുഴിച്ചിൽ പാട്ട് കളം മായ്ക്കൽ എന്നിങ്ങനെ ചിട്ട ചെയ്തതാണെന്ന് കരുതാം.

ആദ്യമെല്ലാം ചാണകം മെഴുകിയ പ്രതലത്തിലും ഇന്ന് അത് പരിഷ്കകരിച്ച നിലത്തോ ആണ്‌ കളമെഴുത്തു നടത്തുന്നത്, ആദ്യം ഗണപതി സങ്കൽപ്പത്തിൽ ഷഡ്‌ചക്രം വരച്ചു നിവേദ്യം നൽകി വഴിപാടുകൾക്ക് തടസ്സങ്ങൾ ഇല്ലാതാക്കി തരണമെന്ന് പ്രാർത്ഥിച്ചുകൊണ്ട് കളമെഴുതാൻ തുടങ്ങുന്നു. അരിപ്പൊടി കൊണ്ട് ആദ്യ വര കുറിക്കുകയും പച്ചപ്പൊടി കരിപ്പൊടി കൊണ്ട് രൂപം അടയാളപ്പെടുത്തുകയും തുടർന്ന് ചുവന്ന പൊടി മഞ്ഞൾപ്പൊടി അരിപ്പൊടി എന്നിവകൊണ്ട് കൈകാലുകൾ ആഭരണങ്ങൾ ഉടയാടകൾ ആയുധങ്ങൾ മുഖം കിരീടം എന്നിവയെല്ലാം കൈവിരലുകള്കൊണ്ട് കുറിച്ച് വർണ്ണാഭമാക്കുന്നു. ഭദ്രകാളി രൂപം 4,8,16,32,64 കൈകൾ ഉള്ള രൂപത്തിൽ ആണ്‌ വരയ്ക്കുക, ഒരുഭാഗത്തെ കൈകളിൽ ആയുധങ്ങളും മറുഭാഗത്തു ശുഭസൂചകങ്ങളായ പ്രതീകങ്ങളും ആണ്‌ ഉണ്ടാകുക. പഞ്ചവർണ്ണ പൊടികൾ മാത്രം ഉപയോഗിക്കുന്നത് അവ പഞ്ച ഭൂതങ്ങളെയും പഞ്ച ലോഹങ്ങളെയും സൂചിപ്പിക്കുന്നു എന്നാണ് കാരണവന്മാർ പറഞ്ഞുള്ള അറിവ്. കളമെഴുത്തിനുശേഷം കളത്തിൽ പീഠങ്ങൾ വയ്ക്കുന്നു ഗണപതി, കൈലാസ പീഠം, സപ്തമാതൃക്കൾക്കുള്ള പീഠം എന്നിവ നിർബന്ധമാണ്. തുടർന്ന് കളം പൂജ ആണ്‌, മേൽശാന്തി ഗണപതി നേദിച്ചു ഭഗവതിക്കുള്ള നേദ്യം പൂജ കഴിക്കുന്നു. ചിലയിടങ്ങളിൽ പള്ളി വാളും ചിലമ്പും എഴുന്നള്ളിച്ചു കളത്തിൽ വയ്ക്കുന്നു.കളത്തിലെ മറ്റു ചടങ്ങുകളായ അരങ്ങു വിതാനിക്കൽ (കുരുത്തോല ആലില മാവില വെറ്റില അടയ്ക്ക മാല എന്നിവ തൂക്കൽ) തുടങ്ങി കൂറ (ചുവന്ന പട്ട് മുകളിൽ വിതാനിക്കൽ) ഇട്ടു ഗണപതി സങ്കല്പം ഷഡ്‌ചക്രം കുറിച്ച് കളം വരച്ചു വിളക്ക്, പീഠങ്ങൾ വച്ചു കൈലാസ പീഠ പൂജ സപ്ത മാതൃകകളുടെ പൂജ ഭഗവതിക്ക് തിരി ഉഴിയൽ പാട്ട് കളം മായ്ക്കൽ കൂറ വലിയ്ക്കൽ എന്നിവ വരെ കുറുപ്പിന്റെ ചുമതലയാണ്. കൂറ ഇട്ട് കഴിഞ്ഞാൽ വലിക്കുന്നത് വരെ അവിടെ ഭഗവതി സാന്നിദ്ധ്യം ഉണ്ടാകുമെന്നാണ് വിശ്വാസം.

കുറുപ്പിൻ്റെ തിരി ഉഴിച്ചിലിനു മുൻപ് വഴിപാടുകാരെ കൊണ്ട് കളം ഭഗവതിക്ക് സമർപ്പിക്കുന്നു എന്ന സങ്കൽപ്പത്തിൽ ദക്ഷിണവച്ചു കളം കയ്യേൽക്കുന്നു . തിരിയുഴിച്ചിൽ ഭഗവതി അഷ്ടദിക് പാലകർ സപ്തമാതൃക്കൾ എന്നിവർക്കായാണ് നടത്തപ്പെടുന്നത്, ഈ സ്ഥാനങ്ങളിൽ എല്ലാം അക്ഷതവും പൂവും ചേർത്ത് ദേവതാമന്ത്രം ചൊല്ലി തൂവുന്നു. ശേഷം ബ്രാഹ്മണരെയും ഊരാളരെയും വഴിപാട്കാരേയും താലം ഉഴിഞ്ഞു അവസാനിപ്പിക്കുന്നു. ചിലയിടങ്ങളിൽ കളത്തിൽ ഗുരുതി നിവേദ്യവും നടത്തുന്നു. ശേഷം ഗണപതി സരസ്വതി സ്തുതി പാടി ദാരിക വധം കഥ വർണ്ണിച്ചു പാടുന്നു ഭഗവതിയുടെ കേശാദിപാദം പാടുന്നു ശിവനെ, ശാസ്താവിനെ സ്തുതിച്ചു പാടി മംഗളം പാടി അവസാനിപ്പിക്കുന്നു. ശേഷം കൂറയിലേക്ക് മൂർത്തിയെ ആവാഹിച്ചു കളം മായ്ക്കുന്നു. താലപ്പൊലി ഉള്ള സ്ഥലങ്ങളിൽ താലപ്പൊലിക്ക് ശേഷമേ കളം മായ്ക്കൽ പതിവൊള്ളൂ. കളം മായ്ക്കുന്ന പൊടികൂട്ടുകൾ (വരയ്ക്കാൻ ഉപയോഗിക്കുന്ന പൊടികൾ) തന്നെയാണ് പ്രസാദമായി നൽകുന്നതും. കളം അവസാനിക്കുന്നതോടെ പഞ്ചവർണ്ണ പൊടികൾ ചേർന്ന് ചാരനിറം ആയി മാറുകയാണ്, ഒരു മനുഷ്യായുസ്സും അവസാനിക്കുമ്പോഴും പഞ്ചഭൂതാത്മകമായ ശരീരം ഇതേപോലെ ചാരം ആയി മാറുന്നു. എല്ലാം പ്രകൃതി നിശ്ചയമെന്ന സത്യം ആണിതും.

കടപ്പാട് : മധു വാരണാട്ട്